Градоначалникот Шилегов изврши увид во градежните активности за реконструкција на булеварот Крсте Мисирков во делот на општина Центар. Булеварот се реконструира на потегот од зградата на МАНУ до крстосницата кај Мавровка, во должина од 550 метри.
– Пред две години завршивме со реконструкцијата на првата фаза од истиот булевар. Го опфаќаше потегот од Мавровка до Бит Пазар, го реконструиравме и бул. Кочо Рацин на потегот од бул. К.Ј.Питу до бул. Св. Кирил и Методиј. Ако на тоа ја додадеме и изградбата на бул. Х.Т. Карпош, како и реконструкцијата на улицата Бихачка кои ги завршивме изминативе 2 години, можеме да кажеме дека главната сообраќајна артерија на правецот север-југ од Водно до северниот дел на скопската обиколница е во одлична состојба. Реконструкциите на сите улици од и од годинешнава градежна офанзива ги завршуваме со рекордно кратки рокови. Се со цел да обезбедиме услови за одвивање на сообраќајот без создавање на сообраќаен метеж. Новите стандарди на квалитет во работењето, градењето по план и рекордно брзите рокови во кои ги завршуваме реконструкциите се нешто што граѓаните го препознаваат и поздравуваат секојдневно – рече Шилегов.
За реконструкцијата на булеварот Крсте Мисирков од Буџетот на Град Скопје ќе бидат потрошени околу 32 милиони денари, а реконструкцијата се предвидува да заврши во рок од 45 дена.
Извор Град Скопје