Имајќи претходно четири неуспешни обиди, Талин конечно ја понесе титулата за Европска зелена престолнина за 2023. Естонскиот главен град ги победи останатите 16 финалисти, вклучувајќи ги Хелсинборг (Шведска), Краков (Полска) и Софија (Бугарија) во главното финале.
Холистичкиот пристап на Талин, бесплатниот јавен превоз, пренамената на brownfield локации и зеленото амбасадорство беа доволна мотивација за жиритo, да го даде својот глас за овој град.
Четири клучни планови
Зелениот пристап на Талин се заснова на 4 клучни планови:
- Подобрување на енергетската ефикасност и внатрешната клима на згради
- намалување на јаглеродните емисии со стимулациски понуди на луѓето што е можно помалку да користат автомобил
- заштита и зголемување на биодиверзитетот во градот
- достигнување на циркуларна економија
Наградата е чек од 600,000 евра којшто ќе се потроши за одржливите визии за градот.
Опрашувачки автопат
Една од одличните зелени иницијативи на Талин е и новиот парк Putukaväila park (се однесува на Опрашувачки автопат). Тој претставува 13 километри неискористен простор претворен во урбани ливади со цел охрабрување за опрашување од страна на пеперутки, бумбари и пчели. Опрашувачката патека поминува низ 9 станбени блокови, железнички станици, а има инсталирано и велосипедски патеки. Има и план за поврзување на овој дел со трамвај, со што центарот на градот ќе може да се поврзе и со плажата Stroomi.
Претходните обиди на Талин за Европска зелена престолнина
Талин претходно се натпреваруваше за Европска зелена престолнина за 2018, 2019, 2020 и 2022, а во последните два наврати беше и финалист. Оваа година Талин се натпреваруваше со Софија (Бугарија), Логроно (Шпанија), Загреб (Хрватска), Даблин (Ирска), Каљари (Италија), Варшава, Краков, Гдањск и Жешов (Полска), Скопје (Македонија), Хелсинборг (Шведска), Белград (Србија), Кошице (Словачка), Газиантеп и Измир (Турција).
Европска Зелена Престолнина
Оваа титула се доделува секоја година на градови со над 100,000 жители, врз основа на 12 критериуми. Тие се: квалитет на воздух, бучава, отпад, вода, природа и биодиверзитет, одржлива употреба на земја и почва, зелен раст и еко-иновации, намалување на климатски промени, адаптација на климатски промени, одржлива урбана мобилност, енергетска ефикасност и раководење.
Претходни носители на оваа титула се: Стокхолм, Шведска (2010), Хамбург, Германија (2011), Виториа-Гастеис, Шпанија (2012), Нант, Франција (2013), Копенхаген, Данска (2014), Бристол, Велика Британија (2015), Љубљана, Словенија (2016), Есен, Германија (2017), Најмеген, Холандија (2018), Осло, Норвешка (2019), Лисабон, Португалија (2020), Лахти, Финска (2021) и Гренобл, Франција (2022).
Победници за наградата Европски зелен лист за 2022
На церемонијата во Лахти, се додели титулата и за Европски зелен лист 2022. Овој пат, носители на титулата ќе бидат два градови и тоа: Валонго, Португалија и Винтерсвајк, Холандија.
Оваа годишна награда е проследена со чек од 200,000 евра и се доделува на градови со популација од 20,000 до 100,000 жители.
Целиот текст може да се прочита тука.